ProLingua, plataforma a prol da defensa e promoción da lingua galega

  • Cando amar é pecado

  • Canción dedicada a ProLingua e incluída no disco De Amor, dor e loita co que A Quenlla celebra o seu 30 aniversario. Letra e música: Baldomero I. D.

    Letra

Loading Audio Player...

Promoción

Banner principal

 

«Non estou aquí pola lingua dos meus pais nin pola miña, estou pola dos meus fillos e dos meus netos.»

-Manifestación pola lingua galega en outubro de 2009 en Compostela


Ver o proxecto

Voces

prolingua.gal, somos Pioneiros

Onte a Asociación Puntogal celebrou un acto no Museo do Pobo Galego para dar a coñecer os 93 enderezos seleccionados que se poderán activar co .gal a partir do 25 de xullo. De entre un total de 134 solicitudes presentadas ao programa Pioneiros, escolléronse aquelas que pertencían a empresas, administracións, fundacións e asociacións que tivesen maior representatividade na sociedade galega.

Das candidaturas recibidas 39 foron administracións públicas, 32 empresas e 63 para asociacións. De entre estas escolléronse 35 dominios para administracións públicas, 15 para empresas e 43 para asociacións. Entre os pioneiros están todos os partidos políticos con representación parlamentaria e Compromiso por Galicia; os clubes galegos de fútbol de primeira división (celta.gal, rcdeportivo.gal); empresas coma Gadis, R, Feiraco ou Rei Zentolo; xornais coma Galicia Confidencial, Praza Pública, Sermos Galiza, La Voz de Galicia ou El Correo Gallego; as tres universidades galegas; institucións coma a Real Academia Galega, o Consello da Cultura Galega ou o Museo do Pobo Galego; as empresas editoriais Galaxia e Xerais; a Deputación de Lugo e os concellos de Teo, Vilar de Santos, Redondela, Pontevedra, Ponteceso, Ordes, Manzaneda, Castrelo de Miño, Cambre, Ribadeo ou Carballo; colexios profesionais coma o de xornalistas e o de enxeñeiros informáticos; a Fundación Castelao, a Fundación Isla Couto e a Fundación Otero Pedrayo; estes son algúns dos nomes propios que se poden consultar na listaxe completa da páxina da Asociación Puntogal.

ProLingua foi unha das 43 entidades sen ánimo de lucro seleccionadas para inaugurar a partir do venres o dominio .gal. Esta plataforma está fondamente agradecida pola escolla, pero tamén polo traballo xeneroso e apartidario que leva realizado a Asociación Puntogal dende a súa creación en 2006. Así llo fixemos saber á súa directiva no encontro que mantivemos o día 7 de xullo, cando solicitamos formar parte do programa Pioneiros.

Onte non podiamos faltar ao lanzamento do dominio .gal, por iso algunhas persoas pertencentes a esta plataforma trasladáronse a Bonaval, para nun lugar tan emblemático coma o Museo do Pobo Galego, o noso museo, dar a benvida ao noso dominio, ao dominio do pobo galego. Dende o vindeiro venres temos unha bandeira de noso coa que navegar pola rede, con ela indicarémoslle ao mundo quen somos. Dende ProLingua, esta pequena dorna apartidaria e plural, izarémola ben alta para seguir bolinando a prol da defensa e promoción da lingua galega.

Fotografía: Alberto Lema

Na imaxe: Xavier Senín, Manuel Bragado, Camilo Regueiro, Edita de Lorenzo, Manuel González, Francisco Fernández Rei, Malores Villanueva, Manuel González Prieto

Publicado
Xul 23
Autor
Normal Admin (admin)


Novas

USO DE COOKIES

Empregamos cookies propias e de terceiros para mellorarmos a túa experiencia e os nosos servizos, así como para mostrarche, desde o noso sitio web ou desde os de terceiros, publicidade baseada na análise dos teus hábitos de navegación. Se continúas navegando, consideramos que aceptas o seu uso.
Podes obter máis información na nosa Política de Cookies.