(...) Desde os días no que o piñeirista García-Sabell recorría como Delegado do Goberno a Lei de Normalización non se coñecera outra igual. O propósito estratéxico de Núñez Feijóo é agora o de lograr aquilo que García-Sabell non conseguiu. Entre tanto, todas as enerxías que a Xunta tería que mobilizar gobernando realmente nos sectores agrogandeiro, pesqueiro, da ordenación do territorio, de medioambiente, cultural, de reforma administrativa e modernización en xeral, sen esquencer as políticas sociais nestes tempos feos e duros, parecen pervertirse na dirección monográfica dunha política lingüística obsesivamente españolista e anti-galega.
Unha enquisa fraudulenta aos pais dos alumnos serviu de preparación artilleira para a derrogación dun decreto que, moderadamente, trata de establecer unha paridade entre o idioma que crearon os nosos antepasados e o que naceu no norte da provincia de Burgos. En operación de comando secreto, interviuse na normativa de pre-escolar. Con astucia, decidiuse que o fomento no mundo fashion podía beneficiar e normalizar o uso do galego e os acordos que houbera ao respecto foron reducidos á nada, co que se pretende que as masas vexan cos ollos da carne e cos do desexo que o luxo e a fastuosidade non casan coa lingua proletaria dos avós. O galego foi arredado das oposicións a fin de que os numerosísimos aspirantes a funcionario considerasen a lingua do País definitivamente inútil. O PP executa un programa de guerra psicolóxica cuxo fin é conseguir que o pobo perda o orgullo de ser galego e se someta facilmente aos dictados de Madrid (...)
Ler artigo completo hoxe en Faro de Vigo
o out 2nd, 2009 ás 9:34 am
Francamente, paréceme desafortunadísima a comparanza da situación actual cos primeiros tempos da autonomía, e a analoxía entre A. Núñez Feijóo e D. García-Sabell do xénero lunático, pero non por iso menos insultante. As teimas persoais e as fantasías ideolóxicas de X. L. M. Ferrín son de sobra coñecidas, e ten todo o dereito a airealas, cousa que fai sempre que ten ocasión (pois non lle faltan medios que as recollan).
Coido que ProLingua non lle fai ningún favor á lingua galega publicitándoas no seu taboleiro. Que conste a miña protesta polas alusións directas a G. Sabell, e polas indirectas a R. Piñeiro.